أسرار نصب شركات التوظيف علي السوشيال ميديا

  السلام عليكم.. 

عاوز اعرفكم حاجة مهمة جداً بخصوص الاعلانات الي بتنزل علي الفيسبوك في جروبات كتير اوي و تقريباً بتكون بنفس السيناريو.

و المصيبة أن الاعلانات دي للعب بمشاعر و اعصاب الشباب الغلبان الي مش لاقي شغل و دة كلة لية... علشان العمولات

بصو كدة علي الإعلان دة:

صورة من اعلانات النصب

الاعلانات دي بقت تقريباً موجودة في كل حتة علي الفيسبوك لدرجة اني و انا بتصفح في أي تطبيق بلاقيها هيا هيا...

و بعدين بيحطولك مرتبات غريبة أوي .. لو انت بتتاجر في الحشيش مش هتجيب الارقام دي .

و بعدين دائما الاعلانات دي عن شركات ثابتة..

زي concentrix و webhelb و teleperformance

و الحاجات الي شبة دي...

فا انا كنت قاعد في يوم قولت اجرب اتصل باللي حاطط رقمة دة و اشوف ايه الحكاية.

لقيت الي بيرد عليا واحدة صوتها حلو اوي و واضح كمان أنها تعليم عالي و مظبطة حالها.

فا لما كلمتها اديتني رقم تاني غير الرقم بتاعها علشان قال اية ابعت علية voice note لمدة تلات دقائق بصوتي بالانجليزي علشان اعرف نفسي فيه.

قال ايه يعني علشان تقيم الإنجليزي بتاعي...

احييييه... انتي بقي الي هاتقيمي الإنجليزي بتاعي.. بصفتك ايه أن شاء الله... مديرة المعهد البريطاني مثلاً..

المهم ... بعت الvoice note بتاعتي زي ما هي قالت للرقم التاني بقه علشان قال اية يسجلو عندو..

اتاري الحوار كلة أساساً من اول البت الي صوتها حلو الي ردت عليا في الاول دي لحد الراجل الي بعتلة التسجيل الصوتي. طلع في الاخر حوار و طلعوا هما حاجة كدة زي مقاولين الأنفار.. عمالين يجمعوا في ناس و يبعتوا للشركات و يقول لهم احنا اهوه..شغالين علشان بعد كل دة ياخدوا عمولات علي قفا الشباب الغلبان الي قاعد متعلق بالأمل انو قدم في شركة كبيرة.. و كله في الاخر هجايص...

المهم ..قولت افضل معاهم للأخر و اشوف آخرهم اية..

بعدها بيوم لقيت حد بيكلمني بيقولي انت عندك انترفيو في شركة اسمها webhelb و قال ايه الميعاد يوم الجمعة الساعة ٧ بالليل.

المهم .. روحت الشركة دي و سألت فين الانترفيو.. طلع الحوار كلة أنك بتروح تعمل انترفيو مدتة بالظبط ٣ دقايق و بيتسجل عندهم انك عملت الانترفيو و بيدوا للناس الي كلموك في الاول دول عمولات ..و العمولة بتبقي علي كل راس بتروح تعمل الانترفيو دة...

بذمتكم .. في اوسخ من كدة.. النصابين  دول بيلعبوا بأعصابكم و مشاعركم بمقابل الفلوس.؟

حسبي الله ونعم الوكيل